Misas de Pentecostés

As Reliquias de San Xoán Bosco en Cambados

Hoxe luns, organizado polos Salesianos de Castrelo, recibiremos a reliquia de S. Xoán Bosco, que está permanentemente en Turín (Italia) onde el viviu e morreu, pero con motivo do segundo centenario do seu nacemento, que se celebrará o vindeiro 2015, está a recorrer o mundo para a súa veneración. Pero ¿quen foi S. Xoán Bosco?.

  S. Xoán Bosco foi sen dúbida un dos persoeiros máis importante do século XIX, que revolucionou o mundo do ensino no momento da revolución industrial, educando a xuventude daquel tempo e preparándoa para o traballo na industria creando a formación profesional.

  Naceu S. Xoán Bosco en Bechi, preto de Castelnuovo d’Asti, a cinco leguas de Turín, o 15 de agosto do ano 1815. Quedou orfo ós dous anos e a súa nai tivo que facer números de traballo e sacrificio para sacar adiante os seus fillos e o fillastro.

  De pequeno ganouse a vida de pastor, tiña un enorme interese por aprender e dunha memoria e intelixencia prodixiosa. Un veciño ensinoulle a ler en catro semanas. Cerca de Becchi vivía un sacerdote que se ofreceu a ensinarlle, e despois de varias peripecias encontrou a súa vocación sacerdotal, celebrando a súa primeira misa o 6 de xuño do ano 1841; e vai realizar o seu gran labor sacerdotal nos barrios da cidade de Turín na que vivía a convulsión da primeira industrialización. Fundou congregacións relixiosas e desenvolveu o seu labor educativo cos mozos máis necesitados do convulso Turín da segunda metade do XIX. Baseou o seu sistema educativo, o sistema preventivo, en tres alicerces: razón, relixión e amor.

  O seu prestixio como sacerdote e como educador dos mozos necesitados ou en risco de exclusión social, valeulle o respecto das autoridades civís e relixiosas do seu tempo e do seu país, así como unha notable fama no estranxeiro. As súas obras foron requiridas directamente por xefes de estado e autoridades eclesiásticas de numerosos países.

  Foi canonizado polo Papa Pío XI o 1 de abril de 1934, e Xoán Paulo II, en 1989, proclamouno «Pai, Mestre e Amigo da Mocidade».

¿POR QUÉ AS RELIQUIAS VIAXAN POLO MUNDO?.-

  Con ocasión de celebrarse no ano 2015 os 200 anos do nacemento de Don Bosco, o Reitor Maior, Don Pascual Chávez, quixo que unha reliquia significativa do Santo dos mozos visitase toda a Congregación. Xa estivo en varios continentes e, neste ano 2012 visita as presenzas salesianas en España.

É o desexo da Congregación que este acontecemento fortaleza a nosa vida cristiá, renove o noso compromiso por traballar no medio da mocidade máis necesitada e que o testemuño de Don Bosco faga renacer o noso desexo de ser fieis a el.

AS RELIQUIAS NA IGREXA.-

  Deus fáísenos presente, fálanos e actúa a través da vida dos santos, testemuñas e seguidores seus.  

A Igrexa, desde os seus inicios, conservou con especial coidado os restos dos santos, tanto que as súas mesmas tumbas convertéronse rapidamente en lugar de peregrinación. Moitos altares das igrexas contiñan a reliquia dalgún santo, especialmente dos mártires. O Concilio Vaticano II lembra que «de acordo coa tradición, a Igrexa rende culto aos santos e venera as súas imaxes e as súas reliquias auténticas».

A veneración das reliquias dun santo, práctica de relixiosidade popular, ten que levarnos a lembrar a esa persoa, lembrar a súa humanidade, pois evocan o seu paso polo noso mundo, a súa vida, o que fixeron, o que sufriron, e tamén a súa morte. Ao proclamalo santo, convértese tamén no noso intercesor e modelo de vida cristiá.

  Achegarnos á reliquia de Don Bosco ten que axudarnos a remontarnos a Aquel por quen Don Bosco traballou, a quen seguiu e amou na súa vida e que foi a causa que moveu toda a súa vida e de quen el quería converterse en "signo e portador do seu Amor aos mozos".

Misas da 7ª Semana de Pascua

Misas da 6ª Semana de Pascua

Misas da 5ª Semana de Pascua